સરોવર ન થઈ શક્યું

સરોવર ન થઈ શક્યું

ચાહ્યું હતું જીવનનું તે ઘડતર ન થઈ શક્યું;

એક રણ હતું, એ રણમાં સરોવર ન થઈ શક્યું.

હરદમ ગુલાબો છાબભરી વ્હેંચતો રહ્યો;

માળીથી તાજાં ફૂલોનું અત્તર ન થઈ શક્યું.

દિલને હજારો વાર દબાવ્યું, છતાં જુઓ,

આ મીણ એનું એ જ છે, પથ્થર ન થઈ શક્યું.

ખંડેર દેખી આશના કંઈ કાફલા રડ્યા;

તૂટેલ આ મિનારાનું ચણતર ન થઈ શક્યું.

હરણાંની પ્યાસ રણમાં સદાની છીપી ગઈ;

શું ઝાંઝવાંથી, કાર્ય મનોહર ન થઈ શક્યું?

પૂછી મને મનસ્વી પ્રણયની કથા? સુણો!

મેં જે ચહ્યું તે આપથી અકસર ન થઈ શક્યું.

‘સાબિર’ નજર ઝુકાવીને ચાલો કદમ-કદમ;

આ માર્ગમાં પડેલ કો' પગભર ન થઈ શક્યું.

sarowar na thai shakyun