રેખ્તા
હિન્દવી
સૂફીનામા
રાજસ્થાની
ઠીક નથી
theek nathi
ચંદ્રેશ મકવાણા
ચંદ્રેશ મકવાણા
તરસ્યે તરસ્યા તળાવ વાઢી ફાંટ ભરો, એ ઠીક નથી;
તમે અમારી તરસ વિશે કંઈ વાત કરો, એ ઠીક નથી.
ખરવું હો તો હાલ ખરો, ઓ પીડ ભરેલાં પત્તાંઓ,
અગન ભરેલા આંગણિયામાં રોજ ખરો, એ ઠીક નથી.
ધરવું હો તો મારી માફક આંખો ફાડી ધરો તમે,
ગળા લગોલગ ગાંજો પીને ધ્યાન ધરો, એ ઠીક નથી.
અમે અમારી પાંસળીઓમાં પથ્થર ખડકી નાખ્યા છે,
તમે રંજનો રેલો થઈને ત્યાંય કરો, એ ઠીક નથી.
દ્વંદ્વ ભરેલી દૃષ્ટિ માથે ડહોળાયેલાં દૃશ્યો પટકી,
તમે ઊકળતાં અંધારાંની ઊંઘ હરો, એ ઠીક નથી.
સ્રોત
- પુસ્તક : વૃક્ષ નથી વૈરાગી (પૃષ્ઠ ક્રમાંક 18)
- સર્જક : ચંદ્રેશ મકવાણા
- પ્રકાશક : એન. એમ. ઠક્કરની કંપની
- વર્ષ : 2009