કોઈને કંઈ પૂછવું છે?

મંદ વેગે ચાલતો

(તેથી જ તો ચાબુકના ફટકારથી)

દોરાઈ ને, બપ્પોરમાં

ઉત્તર થકી દક્ષિણ જતા રસ્તા ઉપર

નંબર લગાવેલો જતો પાડો;

અને ત્યાં કાટખૂણે, છેક આડા

પૂર્વથી પશ્ચિમ જતા આસ્ફાલ્ટના રસ્તા ઉપર

ચિક્કાર બસ (માં માણસો માટે હવે જગ્યા નથી!)

ચાલી જતી પૂરજોશમાં ધૂંધવાઈને!—

ને ક્રૉસ પર જે થાય છે તે થઈ ગયું.

લોહીના ખાબોચિયામાં માંસના લચકા

અને બે શીંગના ટુકડા-

(બધું ભેગું કરીને સાંધવા મથતી નજર)–ને

ફાટી આંખે શૂન્યમાં જોતો હવે ડચકાં ભરે!

(યમરાજ પણ છેવટ, પછી, આવ્યા ખરેખર!)

ખાલ મુડદાની (અહીંથી લઈ જઈ આઘે)

ઉતરડે ના ઉતરડે ત્યાં સુધીમાં

આ ગરમ આબોહવામાં લોહી તો જલદી સુકાયું.