આંસુની ધાર

તમે સુણો ગોપી, મથુરામાં મારાં મા ને બાપ છે;

મન વિચારીને જોઉં તો મારો પૂરણ સંતાપ છે.

ન જાણું મામે કંસે શું વેર કીધાં,

મારી માતાને મેં વચન દીધાં;

તમે સુણો ગોપી, મથુરામાં મારાં મા ને બાપ છે,

મન વિચારી જોઉં તો મારે પૂરણ સંતાપ છે.

છ બાલકને શીલા પર માર્યાં,

મારાં માબાપને કારાગૃહમાં પૂર્યાં;

તમે સુણો ગોપી, મથુરામાં મારાં મા ને બાપ છે,

મન વિચારી જોઉં તો મારે પૂરણ સંતાપ છે.

અકરૂર આવ્યા છે તેડવાને માટે,

મારે જાવું છે આજ મથુરા વાટે;

તમે સુણો ગોપી, મથુરામાં માં ને બાપ છે,

મન વિચારી જોઉં તો મારે પૂરણ સંતાપ છે.

રાણી રાધાજી ઊભાં રૂદન કરે,

એને નેણેં આંસુની ધાર ઝરે;

તમે સુણો ગોપી, મથુરામાં મારાં મા ને બાપ છે,

મન વિચારી જોઉં તો મારે પૂરણ સંતાપ છે

પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 2)
સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ, હરિભાઈ કા. મોઢા.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1968

ansuni dhaar