તમને સમય નથી અને મારો સમય નથી

તમને સમય નથી અને મારો સમય નથી;

કોણે કહ્યું કે આપણી વચ્ચે પ્રણય નથી!

વીસરી જવું એ વાત મારા હાથ બહાર છે,

ને યાદ રાખવું એ તમારો વિષય નથી!

રોકી રહી છે તમને તમારી શરમ, અને

મારા સિવાય મારે બીજો કોઈ ભય નથી!

હું ઈન્તજારમાં ને તમે હો વિચારમાં,

એ પણ છે શરૂઆત, કૈં આખર-પ્રલય નથી!

એવું નથી કે એળે ગઈ મારી ઝંખના

એવું નથી કે સાવ તમારે હૃદય નથી!

tamne samay nathi ane maro samay nathi