તમારી યાદમાં રણની રજેરજ તરબતર માગી

તમારી યાદમાં રણની રજેરજ તરબતર માગી;

ફૂલો પાસે જઈ જઈને તમારી નિત ખબર માગી.

મોહબ્બતમાં અમે આ ચાર વસ્તુ ઉમ્રભર માગી;

જિગર માગ્યું, નઝર માગી, અસર માગી, સબર માગી.

ખરેખર એ સમયની પણ છે બલિહારી અરે જીવન!

ચમન પાસે અમે તો ભરવસંતે પાનખર માગી.

ઊઠ્યા ના હાથ પૂરા ત્યાં તો એ મંજૂર પણ થઈ ગઈ;

ખરેખર મુજ દુઆ કાજે ભલા કો'કે અસર માગી.

ધરા ત્યાગી શકાયે ના, રગેરગ લૂણ છે એનું;

અમે જન્નત-જહન્નમ બેય આ ધરતી ઉપર માગી.

બતાવી માર્ગ કોઈને જીવન-સિદ્ધિ વરી લીધી;

વિલયને નોતરી લીધો, સિતારાએ સહર માગી.

પ્રણયમાં તર્ક-વિતર્કો સદા બુદ્ધિ! કર્યાં કર તું;

નથી દીવાનગીએ કોઈ દી લાંબી નઝર માગી.

મુકદરને સદા આગળ ધરે છે માનવી ત્યારે;

મળે છે જિંદગીમાં જ્યારે કો' વસ્તુ વગર માગી.

પતંગાએ તો પળભરમાં બળી ઠારી લીધું હૈયું;

બિચારી દીપિકાએ બળતરા આ રાતભર માગી.

નથી થાવું કદી મંઝિલને રસ્તે એના આભારી;

વિસામો કો' ઉતારા પર પ્રહર કે બે પ્રહર માગી.

નવાઈ શી કોઈ પાગલ ગણી ‘મુકબિલ' તિરસ્કારે;

અમે આ બેકદર દુનિયા કને સાચી કદર માગી.

tamari yadman ranni rajeraj tarabtar magi