ઓ હૃદય, તેં પણ ભલા કેવો ફસાવ્યો છે મને?

ઓ હૃદય, તેં પણ ભલા કેવો ફસાવ્યો છે મને?

જે નથી મારાં બન્યાં, એનો બનાવ્યો છે મને!

સાથ આપો કે ન આપો એ ખુશી છે આપની,

આપનો ઉપકાર, મારગ તો બતાવ્યો છે મને.

સાવ સહેલું છે, તમે પણ એ રીતે ભૂલી શકો;

કે તમારા પ્રેમમાં મેં તો ભુલાવ્યો છે મને.

લ્યો કહો-સુખ આપનારાં કેટલાં ઓછા હશે?

એ જ લોકો યાદ છે જેણે હસાવ્યો છે મને.

હોત દરિયો તો હું તરવાનીય તક પામી શકત,

શું કરું કે ઝાંઝવાંઓએ ડુબાવ્યો છે મને.

કાંઈ નહોતું એ છતાં સૌએ મને લૂંટી ગયા,

કાંઈ નહોતું એટલે મેં પણ લૂંટાવ્યો છે મને.

એ બધાંનાં નામ દઈ મારે નથી થાવું ખરાબ,

સારાં સારાં માનવીઓએ સતાવ્યો છે મને.

તાપ મારો જીરવી શકતાં નથી એ પણ હવે,

લઈ હરીફોની મદદ જેણે જલાવ્યો છે મને.

છે હવે એ સૌને મારો ઘાટ ઘડવાની ફિકર,

શુદ્ધ સોના જેમ જેઓએ તપાવ્યો છે મને.

o hrday, ten pan bhala kewo phasawyo chhe mane?