રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
પેગમ્બર નથી
pegambar nathi
હર્ષ બ્રહ્મભટ્ટ
હર્ષ બ્રહ્મભટ્ટ
એમ ના સમજો નયન સધ્ધર નથી,
રાહ જોવાની હવે ઉંમર નથી!
એમને પણ એ કરે છે દંડવત્
જેમના પ્રત્યે કશો આદર નથી.
દ્વાર સુંદર જોઈને ઈર્ષ્યા ન કર,
એના દરવાજાની પાછળ ઘર નથી!
લોહી પડછાયાઓનું ઊકળી ઊઠ્યું,
વાદળે પૂછ્યું, ‘સૂરજ કાયર નથી?’
એ ગમે ત્યારે ગબડવાનો જ છે,
એના રસ્તામાં કોઈ ઠોકર નથી.
હું તો આ સમજણથી માલામાલ છું,
છે બધું પણ આપણી ખાતર નથી.
કેટલું વાતાવરણ પાવન છે ‘હર્ષ’,
આ નગરમાં સંત-પેગમ્બર નથી!
સ્રોત
- પુસ્તક : આભ દોર્યું તો સૂર્ય ઊગ્યો'તો (પૃષ્ઠ ક્રમાંક 3)
- સર્જક : હર્ષ બ્રહ્મભટ્ટ
- પ્રકાશક : નવભારત સાહિત્ય મંદિર
- વર્ષ : 2015