મારી અભાનતાથી એ પણ ડર્યા કરે છે

મારી અભાનતાથી એ પણ ડર્યા કરે છે;

કાળી ડિબાંગ રાત મને કરગર્યા કરે છે.

સૂરજ ડૂબ્યા પછી પણ જો આગિયા સ્વરૂપે,

રાતોની આંખમાંથી તડકા ખર્યા કરે છે.

હોવાપણાં વિશે હું પૂછ્યા કરું છું પ્રશ્નો,

તું વાતવાતમાં શું ઇશ્વર ધર્યા કરે છે.

થઈ ગયો છે મૂળમાંથી નૌકાવિહીન દરિયો,

પાણી ઉપર હવે બસ પાણી તર્યા કરે છે.

‘નારાજ’માં કોની શ્રદ્ધા ભરાઈ ગઈ છે,

એ પાળિયાની આગળ-પાછળ ફર્યા કરે છે.

mari abhantathi e pan Darya kare chhe