આવશે તો મન મૂકીને આવશે
aavshe to man muukiine aavshe
શૈલેન રાવલ
Shailen Raval

આવશે તો મન મૂકીને આવશે;
પંખીઓ થોડા પૂછીને આવશે?
બારીઓ થોડી ઉઘાડી રાખીએ,
લહેરખી શીળી ઝૂમીને આવશે.
ખૂબ ઊંચા બારણાં રાખ્યા ભલે;
જે વિવેકી છે, ઝૂકીને આવશે.
ઈશ્વરી વરદાન હો જે હાથને;
કોઈના અશ્રુ લૂછીને આવશે.
ટીખળી બાળક સમો તડકો ફરે;
એ તિરાડેથી છૂપીને આવશે!
અર્થ ઘરનો હોય છે ઘર, દીકરી-
-સ્કૂલથી જ્યારે છૂટીને આવશે.
મહેંક માટીની ગમે ત્યાંથીય પણ
સરહદો કપરી કૂદીને આવશે!



સ્રોત
- પુસ્તક : એ વાત અલગ છે (પૃષ્ઠ ક્રમાંક 2)
- સર્જક : શૈલેન રાવલ
- પ્રકાશક : પોતે
- વર્ષ : 2016