જેમ પલકાવે એ પાંપણ આપણે પલકાઈએ

જેમ પલકાવે એ પાંપણ આપણે પલકાઈએ

આપણે એથી વધુ આપણને શું સમજાઈએ.

એ લખે કે ના લખે આપણને વહેતા જળ ઉપર

જેટલું એ વાંચે એને એટલું વંચાઈએ.

એને ખળખળવું હો તો પથ્થરમાં પણ એ ખળખળે

આપણે જળમાંય એના ભીંજવ્યા ભીંજાઈએ.

એની મરજી હોય તો સરીએ પાન પરથી ઓસ જેમ

સરતાં સરતાં એને જોવા પળ બે પળ રોકાઈએ.

રંગ કે ફોરમ કે આ કુમળાશની વાત જ નથી

એને ગમીએ એમ ખીલીએ તો ખીલ્યા કહેવાઈએ.

jem palkawe e pampan aapne palkaiye