જગાવે અહાલેક છે, કોણ આ?

હૃદયમાં જગાવે અહાલેક છે, કોણ આ?

પ્રણયમાં જગાવે અહાલેક છે, કોણ આ?

ભીતરમાં જરા પણ તમસની જગા ના રહી,

ઉદયમાં જગાવે અહાલેક છે, કોણ આ?

નહીંતર બધાં આમ કંઈ કેડ બાંધી ન લે,

સમયમાં જગાવે અહાલેક છે, કોણ આ?

લખાતી ગઝલ કે ગવાતી ગઝલ છે બધે,

કે લયમાં, જગાવે અહાલેક છે, કોણ આ?

નથી ડર રહ્યો મોતનો ઠામુકો પણ હવે,

વિલયમાં જગાવે અહાલેક છે, કોણ આ?

'સિકંદર' બધાં હાર સ્વીકારતાં થઈ ગયાં,

વિજયમાં જગાવે અહાલેક છે, કોણ આ?

jagave ahalek chhe kon aa?