રેખ્તા
હિન્દવી
સૂફીનામા
રાજસ્થાની
હૃદયની તસવીર
hridayni taswir
કાબિલ ડેડાણવી
કાબિલ ડેડાણવી
જોઈ 'કાબિલ'ની ગઝલ રૂપે પ્રણયની તસવીર.
જાણે શબ્દો મહીં ઈશ્વરના હૃદયની તસવીર.
મેં કદી ચીતરી નથી વિરહ-સમયની તસવીર,
નહીં તો જોવાને મળત જગને પ્રલયની તસવીર.
કાં તો સંપૂર્ણ હશે યા તો અતિશયતા-ભરી,
હું સમી સાંજે બનાવું છું ઉદયની તસવીર.
એટલા માટે કદાચિત્ત છે એ સૌથી ઉત્તમ,
એક ડરપોકે બનાવી છે અભયની તસવીર.
જ્યારે-જ્યારે કોઈ નિર્દોષ વદન મેં જોયું,
એમ લાગ્યું કે છે એ તારા હૃદયની તસવીર.
લાગણી કોણ દુભાવે કોઈ હારેલાની,
એટલે દોરી નથી મારા વિજયની તસવીર.
કોઈ દંભીના પરિચયમાં જરા આવ્યો છું,
નિત-નવી જોવા મળી ખોટા વિનયથી તસવીર.
એને સુંદર કોઈ કહેશે, કોઈ કરશે ટીકા,
ના, નથી ખેંચવી કોઈના હૃદયની તસવીર.
એ તો ખુદ ચિત્ર છે રેખાઓ વિનાનું, 'કાબિલ'!
કોણ નાહકની ભલા ખેંચે પ્રણયની તસવીર.
સ્રોત
- પુસ્તક : મધુવન (પૃષ્ઠ ક્રમાંક 74)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4