chibawli chhatan gami chhe gajhal - Ghazals | RekhtaGujarati
search search
લૉગ-ઇન

ચિબાવલી છતાં ગમી છે ગઝલ

chibawli chhatan gami chhe gajhal

અદમ ટંકારવી અદમ ટંકારવી
ચિબાવલી છતાં ગમી છે ગઝલ
અદમ ટંકારવી

ચિબાવલી છતાં ગમી છે ગઝલ

કે પડોશીની છોકરી છે ગઝલ

માએ માંડેલી વારતામાંથી

ઊડી ગયેલી તે પરી છે ગઝલ

તારા પગલામાં ફૂંક મારી તો

એની અંદરથી નીકળી છે ગઝલ

હાથમાંથી ગયો પાલવ સરકી

તે પછી મુઠ્ઠીમાં બચી છે ગઝલ

છે સુખનફહેમ ગામની છોરી

નવમા ધોરણમાં એ ભણી છે ગઝલ

અમને દઈ ગઈ જે હાથતાળી સદા

એ હથેળી ઉપર લખી છે ગઝલ

શ્વાસની ટોચે લોહીને તળિયે

અમને ક્યાં ક્યાંથી આ જડી છે ગઝલ

કાફિયો ખેંચતા દુશાસનને

ક્યાં ખબર છે કે દ્રૌપદી છે ગઝલ

હતી તત્સમ હજી ગઈકાલ સુધી

આ જ તદ્ભવ બની ગઈ છે ગઝલ

આમ જુઓ તો બાદશાહી છે

આમ જુઓ તો ચાકરી છે ગઝલ

આંસુ માગ્યું તમે અક્ષરરૂપે

ને અમે ભેટમાં ધરી છે ગઝલ

દુનિયાદારીના છેદ ઊડી ગયા

તે પછી શેષમાં રહી છે ગઝલ

સંકોચાઈને હાઇકુ થઈ ગઈ

આજ કંઈ એટલી રૂઠી છે ગઝલ

ગાલગા ગાલગા જેવું છે કશુંક

ક્યાં હજી પૂરીપાધરી છે ગઝલ

એક મલાજાની આણ આપીને

આ કળિયુગમાં સાચવી છે ગઝલ

એ જ છે આપણી નિશાળ હવે

પેન પાટી ને ચોપડી છે ગઝલ

હાથમાં લઉં તો છે કરતાલ અદમ

ફૂંક મારું તો વાંસળી છે ગઝલ

સ્રોત

  • પુસ્તક : અદમ ટંકારવીની ગઝલોની ચોપડી (પૃષ્ઠ ક્રમાંક 9)
  • સર્જક : અદમ ટંકારવી
  • પ્રકાશક : રન્નાદે પ્રકાશન
  • વર્ષ : 1997