રેખ્તા
હિન્દવી
સૂફીનામા
રાજસ્થાની
છલના!
chhalna!
વીરુ પુરોહિત
વીરુ પુરોહિત
હરણ દઈ, ઝાંઝવાનું જળ દઈ છલના જ કીધી છે!
જીવનને મોતનું એક છળ દઈ છલના જ કીધી છે!
નર્યો કપટી છે અંધાધૂંધ ઓગળવાનો આ ઉત્સવ,
પૂરી લાક્ષાગૃહે, અટકળ દઈ છલના જ કીધી છે!
એ જાદુગર લઈને હાથમાં સૂરજ ઊભો છે, પણ -
બધાને આંખમાં વાદળ દઈ છલના જ કીધી છે!
દિવસ 'ને રાત શોધો તે છતાં કૈં હાથ ના આવે,
ભરી મબલખ ભીતર, ભોગળ દઈ છલના જ કીધી છે!
તું જેને મુગ્ધતાથી ઓળખે છે એ જ શખ્સે તો
પીગળતી પળ સમો કાગળ દઈ છલના જ કીધી છે!
સ્રોત
- પુસ્તક : ગઝલશતક (પૃષ્ઠ ક્રમાંક 79)
- સંપાદક : હર્ષદ ત્રિવેદી
- પ્રકાશક : ગુજરાત સાહિત્ય અકાદમી
- વર્ષ : 1999