રેખ્તા
હિન્દવી
સૂફીનામા
રાજસ્થાની
ચશ્માંના કાચ પર
chashmanna kach par
રમેશ પારેખ
રમેશ પારેખ
બેસે ઊઠે - પ્રભાત આ ચશ્માંના કાચ પર
ને આવે - જાય રાત આ ચશ્માંના કાચ પર
આવીને સ્વપ્ન જેમ જે પાછાં વળી જતાં
રહી જાય એની વાત આ ચશ્માંના કાચ પર
ઘર પાસે કંઈક થાય જો પગરવ તો ઊમટે
ઘરની બધી મિરાત આ ચશ્માંના કાચ પર
સ્થિતિ, પ્રસંગ, શક્યતા, સંબંધ ધસમસે
ઝીલતો રહું પ્રપાત આ ચશ્માંના કાચ પર
અડકી શકો ન એવી ક્ષિતિજોની સ્હેજમાં
થઈ જાય મુલાકાત આ ચશ્માંના કાચ પર
ફૂટી જવાનાં દૃશ્ય ને ફૂટી જવાના કાચ
ઊઠ્યો છે ઝંઝાવાત આ ચશ્માંના કાચ પર
ઈશ્વરની જેમ લહેરથી ઊંચકી શકું હવે
હું સારી કાયનાત આ ચશ્માંના કાચ પર
જોઈ લીધું છે, ડોકિયું દર્પણમાં મેં કરી
મારી ય છે બિછાત આ ચશ્માંના કાચ પર
સ્રોત
- પુસ્તક : ક્યાં (પૃષ્ઠ ક્રમાંક 79)
- સર્જક : રમેશ પારેખ
- પ્રકાશક : આદર્શ પ્રકાશન
- વર્ષ : 2007
- આવૃત્તિ : પુનર્મુદ્રણ