રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
પરિપ્રેક્ષ્ય
pariprekshya
સ્નેહલ જોષી
સ્નેહલ જોષી
આ સ્મિત તમારી આંખોનું દત્તકમાં લીધેલું બાળક છે.
આ હોઠ ઉપરની રેખાઓ વિસ્મયમાં ડૂબેલું બાળક છે.
બાળક છે તમારા શબ્દો આ, ભાષા તો નમેલું બાળક છે.
છે આપનો આ વ્યવહાર પ્રથમ દૃષ્ટિએ ગમેલું બાળક છે.
આ ક્રોધ, જે છઠ્ઠો શત્રુ છે, શાસ્ત્રોમાં કહેલું છે એવું;
એ આવે તમારા ચહેરા પર તો તાવ ભરેલું બાળક છે.
એથી જ હકીકત સુંદરતાની ખોઈ છે વારંવાર અહીં;
મારી આ નજરમાં સુંદરતા કાદવમાં પડેલું બાળક છે.
સંપૂર્ણ જગતની શુદ્ધિઓ છે માત્ર તમારી નજરોમાં;
હું તો કહું છું કે નિર્મળતા છાતીએ ચડેલું બાળક છે.
સ્રોત
- પુસ્તક : સૂર્યનો સંદર્ભ (પૃષ્ઠ ક્રમાંક 1)
- સર્જક : સ્નેહલ જોષી
- પ્રકાશક : પોતે
- વર્ષ : 2010