આવશે તો મન મૂકીને આવશે

આવશે તો મન મૂકીને આવશે;

પંખીઓ થોડા પૂછીને આવશે?

બારીઓ થોડી ઉઘાડી રાખીએ,

લહેરખી શીળી ઝૂમીને આવશે.

ખૂબ ઊંચા બારણાં રાખ્યા ભલે;

જે વિવેકી છે, ઝૂકીને આવશે.

ઈશ્વરી વરદાન હો જે હાથને;

કોઈના અશ્રુ લૂછીને આવશે.

ટીખળી બાળક સમો તડકો ફરે;

એ તિરાડેથી છૂપીને આવશે!

અર્થ ઘરનો હોય છે ઘર, દીકરી-

-સ્કૂલથી જ્યારે છૂટીને આવશે.

મહેંક માટીની ગમે ત્યાંથીય પણ

સરહદો કપરી કૂદીને આવશે!

aavshe to man muukiine aavshe