રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
અમદાવાદ-1981
amdawad 1981
મંગળ રાઠોડ
મંગળ રાઠોડ
એ લોકોએ
ગાંધીજીની આંખો પર
પાટા બાંધી દીધા
અને આપણામાંના
કો’ક કો’કને
થોડું થોડું દેખાતું હતું
તે સૌ કોઈ અંધ થયા.
એ લોકોએ
ગાંધીજીના કાનમાં
રૂના પૂમડાં ખોસી દીધાં
અને આપણામાંના
કો’ક કો’કને
જે કંઈ થોડું થોડું સંભળાતું હતું
તે સૌ કોઈ બધિર બન્યા.
એ લોકોએ
ગાંધીજીના મોઢામાં ડૂચો મારી દીધો
અને આપણામાંના
કોઈકને કંઈક સત્ય ઉચ્ચારવું હતું
તે મૂંગા મર્યા.
એ લોકો
કંગાળ હતા કે સમૃદ્ધ હતા?
એ લોકો
(તબીબી) વિદ્યાર્થી હતા કે હિંસાર્થી હતા?
એ લોકો ક્રાંતિકારી હતા કે રૂઢિચુસ્ત હતા?
એ લોકો તેજસ્વી હતા કે મેદસ્વી હતા?
એક મૃત મહાત્માથી ગભરાતા–
એ લોકો
કેટલા ટકા સુવર્ણ હતા?
કે પિત્તળ હતા?
એક અંધ, બધિર ને મૂક નગર
સદીઓ સુધી હવે કરશે અગર મગર...!
સ્રોત
- પુસ્તક : કાવ્યોપનિષદ દલિત કવિતા સંચય (પૃષ્ઠ ક્રમાંક 94)
- સંપાદક : કેસર મકવાણા, ભરત વિંઝુડા
- પ્રકાશક : પાશ્વ પબ્લિકેશન
- વર્ષ : 2022