રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
આવ્યાં છો તો—
Aavya Chho To—
જયન્ત પાઠક
જયન્ત પાઠક
આવ્યાં છો તો અહીં જ રહી જાઓ હવે, રાહ જોઈ
થાકેલાં આ નયન મીંચવા દો તમારા ઉછંગે;
કહેવાની છે કથની હજી તો દુઃખની; રોઈ રોઈ
ગાળ્યા લાંબા વિરહદિન આશ્વાસનોના ઉમંગે.
લંબાવીને ભુવન ભરતું ગાઢ ઘોરે તમિસ્ર
જેમાં તારાગણ નહીં, નહીં ચાંદની ચંદ્રમાની;
એકાન્તોના હતું અધરપે મૌન જામ્યું અમિશ્ર,
હેરાયે ના કિરણરવની ઝાંખીયે જ્યાં નિશાની.
આવ્યાં છો તો અહીં જ રહી જાઓ હવે પાસ મારી,
વાંછું મારે ભવન દ્યુતિછાયા તમારી છવાય;
જામે રાત્રિ દિવસ રસના ઉત્સવો ચિત્તહારી,
સૌની જીભે વિરલ ઊજળું ભાગ્ય મારું ગવાય.
સ્થાને સ્થાને તમ સહ રહો નામ ઉલ્લેખ મારો;
કે વિશ્વે ના અસફલ બને યોગ મારો તમારો.
સ્રોત
- પુસ્તક : વગડાનો શ્વાસ (પૃષ્ઠ ક્રમાંક 1)
- સંપાદક : સુરેશ દલાલ
- પ્રકાશક : નવભારત સાહિત્ય મંદિર
- વર્ષ : 1978