રેખ્તા
હિન્દવી
સૂફીનામા
રાજસ્થાની
લાઘવ ક્યાંય નથી રે કવનમાં..
laghaw kyanya nathi re kawanman
નિર્મિશ ઠાકર
નિર્મિશ ઠાકર
ભૂલ કહે ભ્રમણાને, ભ્રમણા ભૂલવે વાત ભજનમાં:
લાઘવ ક્યાંય નથી રે કવનમાં!
કાલિન્દીનાં જલમાં ઝાંકી
પૂછે કદંબડાળી
યાદ તને બેસી અહીં કોણે
રચી શબ્દની જાળી?
લહર વમળમાં પડે, વમળ ઝટ સરી પડે ચિંતનમાં:
લાઘવ ક્યાંય નથી રે કવનમાં!
કરો કવિને જાણ:
અરથની તાણ રહી છે વરતી!
સ્હેજ ન રાખી લજ્જા લખતાં,
રાવ હવે ક્યાં કરવી?
છંદ કહે લય-પ્રાસને, સહસા ફેર ચડે લોચનમાં:
લાઘવ ક્યાંય નથી રે કવનમાં!
શિર પર ગોરસમટુકી(?)
ના એ છલકી કે નવ તૂટી,
કંકર અંદર-બાહર વાગ્યા
કશું ન નીકળ્યું ફૂટી!
નિર્મિશ કહે ઝટ વેચને પસ્તી...તોલ બધુંય વજનમાં!
લાઘવ ક્યાંય નથી રે કવનમાં!
સ્રોત
- પુસ્તક : વીસમી સદીની ગુજરાતી કાવ્યમુદ્રા (પૃષ્ઠ ક્રમાંક 293)
- સંપાદક : ચન્દ્રકાન્ત શેઠ, યોગેશ જોષી, હર્ષ બ્રહ્મભટ્ટ, ઊર્મિલા ઠાકર
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2007