નહીં જાઉં રે જમુના પાણીડાં

નહીં જાઉં રે જમુના પાણીડાં, મુને મારગડે નંદલાલ મળે;

બાળપણાની સહિયરું દેખે, હું રે ટળું પણ એ ન ટળે. ન૦

અમે અમારે મારગ જાતાં, કાનજી કાંકરડી નાખે રે;

દૂર થકી કોઈ દુરિજન દેખે, એવડી આળ કોણ સાંખે રે? ન૦

અમે રે આહીરડાં સદા સુંહાલાં, કઠિણ કઠોર પેલો કહાનુડો;

કંસરાયની આણ ન માને જશોદાનો કુંવર લાડકડો. ન૦

સાન કરે ને દેહી ૫રવશ થાયે, છાનો વાહે છમકલડો;

નરસૈંયાચા સ્વામીને ક્ષણ ન મેહેલું, જો આવે એ એકલડો. ન૦

nahiin jaun re jamunaa paaniidaan