મોહોલે પધારો માહારા રાજ, માણીગર મોહોલે પધારો

મોહોલે પધારો માહારા રાજ, માણીગર મોહોલે પધારો;

વાહાલ વધારો વ્રજરાજ, માણીગર મોહોલે પધારો. ટેક.

કરી રાખી છે એકઠી, ઘણા દિવસની ગોઠ;

રાજ મળે તો કીજીયે, આવી રહી છે માહારી હોઠ. માણીગર૦

હું પણ દાસી રાવલી, બાંહ્યગ્રહ્યાની લાજ;

જોબન લ્હેરે જાય છે, માણોને માહારા રાજ. માણીગર૦

હું સરખી બહુ આપને, માહારે તો એક આપ;

રેહેવાતું નથી રાજવણ, કોને કહું પરિતાપ. માણીગર૦

સેજ સમારી પુલડે, આનંદ ઉર ન સમાય;

પ્રાણજીવન ત્યાંહાં પોહોડશો, હું તો તળાંશીશ પાય. માણીગર૦

કપ્રીતમ દાસ દયાતણા, શ્રી વ્રજરાજ કુમાર;

ઘણા દિવસની હોંસ છે, પૂરો પ્રાણઆધાર. માણીગર૦

mohole padhaaro maahaaraa raaj, maaniigar mohole padhaaro