બાળકના અપરાધ જુએ જો માત રે, વહાલાજી

બાળકના અપરાધ જુએ જો માત રે, વહાલાજી

ત્યારે તેનો કરે ઘડીમાં ઘાત રે, વહાલાજી

પિતા પુત્રની જ્યારે લાંચ ખાશે રે, વહાલાજી

ત્યારે વળતી ક્યમ જુગમાં જિવાશે રે, વહાલાજી

જલ સીંચ્યાનું મેઘ માગશે મૂલ રે, વહાલાજી

ત્યારે તો શું ટળશે અમારું સૂળ રે, વહાલાજી

હીંડ્યાનું જ્યારે ભોમી ભાડું લેશે રે, વહાલાજી

ત્યારે કોણ ઊભું રહેવા દેશે રે, વહાલાજી

વિશ્વંભર થઈ વહેરો જ્યારે કરશો રે, વહાલાજી

સૃષ્ટિ કેઈ પેરે સંકટ હરશો રે, વહાલાજી

દુનિયાનું દુઃખ દયા કરીને ટાળો રે, વહાલાજી

પૂરણાનંદજી બિરદ તમારું પાળો રે, વહાલાજી

જગત જિવાડો તો મોકલજો મેહ રે, વહાલાજી

નહિ તો પડશે પલક વારમાં દેહ રે, વહાલાજી

હુકમી બંદા હુકમ કરો તો આવે રે, વહાલાજી

નાનાવિધનાં નૌતમ અંન ઉપજાવે રે, વહાલાજી

પ્રીતમના સ્વામી એ પ્રાક્રમ મોટું રે, વહાલાજી

જળ વરસે નહિ તો જીવ્યાનું ખોટું રે, વહાલાજી

Balakna Aparadh Juae Jo Mat Re, Vahalaji