હાવાં હું સખી! નહીં બોલું રે નંદકુંવરની સંગ

હાવાં હું સખી! નહીં બોલું રે નંદકુંવરની સંગ;

મુને 'શશીવદની' કહી છે રે ત્યારની દાઝ લાગી છે અંગે. હાવાં૦

ચંદ્રબિંબમાં લાંછન છે, વળી રાહુ ગળે ખટ માસે રે;

પક્ષે વધે ને પક્ષે ઘટે, કળાપૂરણ નિત્ય તે નવ પ્રકાશે. હાવાં૦

તે કરતાં 'ચંદ્રવદની' કહી તો ઠર્યા હું ને ચંદ્ર એક રાસે રે;

ત્યારે મુજ મુખ પાખે શું અટક્યું છે? જોશે ચંદ્ર આકાશે. હાવાં૦

નહીં તો શિવને સમીપ રાખશે ને ભાલે ચંદ્ર દેખાશે રે;

પ્રસન્ન થઈ પાસે રહેશે, નહિ તો કહેવાય નહીં નિજ દાસે. હાવાં૦

એવડો શ્રમ પણ શીદ કરે? જુઓ, ચંદ્ર પોતાની પાસે રે;

વામ ચરણમાં ઇન્દુ અચળ છે, શીદ રહે અન્યની આશે? હાવાં૦

દયાના પ્રીતમને કહે સખી, જુઓ, શશીમુખ સરખું સુખ પાસે રે;

કોટિપ્રકારે હું નહીં આવું એવા પુરુષની અડાસે. હાવાં૦

haavaan hun sakhii! nahiin bolun re nandkuvarnii sang