રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

છબીલા નંદના રે

છબીલા નંદના રે

છબીલા નંદના રે! તારી ચાલનો ચટકો જો;

છોરા આહીરના રે! તારા મુખનો મટકો જો. છo ૧

ચાલનો ચટકો, મુખનો મટકો, મોહિની નાંખે એમ;

કાળી તારી કાંબળીમાં કામણ દીસે છે કેમ? છo ૨

ચટકો તારી ચાલનો રે, પાવડીએ કંગર કોર;

છુમક છુમક ઘૂઘર વાજે, નેનમાં નાચે મોર. છo ૩

તાણીને બાંધે પાઘડી રે, ઢળતો મૂકે તોર;

શેરીએ લથડતો હીડે, મોરલી તે ઘનઘોર. છo ૪

મુખ દેખાડીને ઘેલાં કીધાં, જાણે હરાયાં ઢોર;

ભાલણ-પ્રભુ રઘુનાથજી, મારા ચિત્તલડાના ચોર. છo ૫

સ્રોત

પુસ્તક : આરાધના : મધ્યકાલીન ભક્તિગીતો (પૃષ્ઠ ક્રમાંક 19)
સંપાદક : ડૉ. શિવલાલ જેસલપુરા
પ્રકાશક : સાહિત્ય સંશોધન પ્રકાશન
વર્ષ : 2002