ગોકુળિયે પધારો રે મારા નંદજી રે, જસોદાજી જોશે વાટ રે;

ટળવળશે મારી માવડીરે, દુઃખ ધરશે મુજ માટ રે. ગો...

કોમળ તે હૈડું તેહનું રે, જાણીએ તે નવનીત રે;

ક્ષણ વાર હે સહે નહિ રે; ધરથી વાધી પ્રીત રે. ગો...

મુગટ તે મયુર પુચ્છનો રે, આપ્યો છે આઇજીને હાથ રે;

રૂડી પેરે રાખજો રે, જેમ નીરધનને ઓથ રે. ગો...

કષ્ટે મે પરોવિયો રે, ગુંજા કેરો હાર રે;

યત્ને તે જાળવજો ઘણું રે, વાંસલડી તે પ્રાણાધાર રે. ગો...

લાખી રંગની ઓઢણી રે, લોબડી તે લલીત શું અંગ રે;

તેને મોંખીક રખે લાગતા રે, કોમળ લાગે અંગ રે. ગો...

કમળ વરણું મોળિયું રે, તે હું બાંધતો શીશ રે;

સાથે તે લાવ્યો નથી રે, જાણ્યું જે કરશો રીસ રે. ગો...

શીકૂં સ્વહસ્તે મેં ગુંથીયું રે, પાટતણું પચરંગ રે;

તેહ રખે વળી વિણસતું રે, લીધું નહિ મેં સંગ રે. ગો...

વાંસુલીડી જે વારે જડી રે, સુંદીર મારૂં શૃંગ રે;

રખે હરે તે ગોવાળીયા રે, વાળી છે તાન તુરંગ રે. ગો...

ગાય ચારીને મેં સાચવી રે, રખે તે દુબળી થાય રે;

દુધ જેનું મુને ભાવતું રે, પ્રેમે તે પાતી મારી માય રે. ગો...

આઇજીને કહેજો એટલું રે, તમ કને મારા પ્રાણ રે;

એવું કો વહાલું નથી રે, સાચી કહું છું વાણ રે. ગો...

મારે અહીં રહેવું નથી રે, વહાલું વૃંદાવન રે;

ચાર દહાડા રહી આવશું રે, સહુનું મનાવી મન રે. ગો...

વેગે હવે તમે સંચોરો રે, લ્યોને સઘળો સાથ રે;

તમથી હું અળગો નથી રે, કહે ભાલણ પ્રભુ રઘુનાથ રે. ગો...