બીજાને મારે શું કરવું?

ધ્યાન ધણી કેરું ધરવું રે, બીજું મારે શું કરવું રે.

સુંદર શ્યામ, બીજાને મારે શું કરવું.

નિત્ય ઊઠીને અમે નાહીએ ને ધોઈએ રે,

ધ્યાન ધણી તણું ધરીએ રે. બીજું...

સંસારસાગર મહાજળ ભરિયો રે વા'લા,

તારે ભરોસે અમે તરીએ. બીજું...

સાધુજનને ભોજન જમાડીએ વા'લા,

જૂઠું વધે તે અમે જમીએ રે. બીજું...

વૃંદા તે વનમાં રાસ રચ્યો રે વા'લા,

રાસમંડળમાં તો અમે રમીએ રે. બીજું...

હીર ને ચીર મને કામ ન આવે, વા'લા,

ભગવાં પહેરીને અમે ભમીએ રે. બીજું...

બાઈ મીરાં કે પ્રભુ ગિરિધર નાગર,

ચરણકમળમાં ચિત્ત ધરીએ રે. બીજું...

bijane mare shu karvu?