ભોળી રે ભરવાડણ હરિને વેચવા ચાલી

ભોળી રે ભરવાડણ હરિને વેચવા ચાલી;

સોળ સહસ્ર ગોપીનો વહાલો, મટુકીમાં ઘાલી. ભોળી રે…

અનાથના નાથને વેચે આહીરની નારી;

શેરીએ શેરીએ સાદ પાડે, લ્યો કોઈ મોરારી. ભોળી રે…

મટુકી ઉતારી માંહી, મોરલી વાગી;

વ્રજનારીને સેજે જોતાં, મૂર્ચ્છા લાગી. ભોળી રે…

બ્રહ્માદિક ઇંદ્રાદિક સરખા કૌતુક એ પેખે;

ચૌદ લોકના નાથને કાંઈ, મટુકીમાં દેખે. ભોળી રે…

ગોવાલણીના ભાગ્યે પ્રગટ્યા અંતરજામી;

દાસલડાને લાડ લડાવે, નરસૈંનો સ્વામી. ભોળી રે…

bholi re bharvadan hari ne vechva chali