રેખ્તા
હિન્દવી
સૂફીનામા
રાજસ્થાની
મર્યાદા
maryada
રતિલાલ છાયા
રતિલાલ છાયા
(અનુષ્ટુપ)
ગઈ લક્ષ્મી : ગયાં પદ્મો : થતાં તું પૃથિવી-પટ
અનોખી સ્વસ્થતા ધારી ડોલતો શાથી અર્ણવ?
ઐરાવત ગયો મૂકી, ઈન્દ્રને મહેલ ડોલવા;
પાંચજન્ય ગ્રહ્યો કૃષ્ણ કાળની વાણી બોલવા;
સૂર્યના સારથિ કેરાં સ્વીકારી તેજ-ઈજનો
લાડીલો અશ્વ ખેડતો આભનાં નીલ કાનનો; 6
અમીકુંભ લીધો દેવે; પીધું રુદ્રે હલાહલ,
વિષ્ણુની ગૌર ગ્રીવાએ વિરાજ્યો મણિ કૌસ્તુભ;
ધન્વંતરી ગયા છાંડી પૃથ્વીનાં દર્દ ખાળવા,
ચન્દ્રમાં આભમાં ચાલ્યા રોહિણી-કંઠ ઝૂલવા; 10
કામદુગ્ધા ગ્રહી ઈન્દ્રે ઇચ્છાની વાડી સીંચવા,
પારિજાત રહ્યાં મોહી રાધિકા–વેણી ગૂંથવા;
સ્વપ્નની સુંદરી જેવાં રંભા ઇન્દ્રપુરી વસ્યાં,
વીરનાં બાહુએ બેઠાં ધનુષ્-કોટિ-પ્રભાવતાં; 14
સમૃદ્ધિ સૌ ગઈ ચાલી છતાં નિર્ધન કાં નહીં?
છે હજી એક મર્યાદા–લાખેણું ધન એ સહી. 16
સ્રોત
- પુસ્તક : સોહિણી (પૃષ્ઠ ક્રમાંક 54)
- સર્જક : રતિલાલ છાયા
- પ્રકાશક : ભારતી સાહિત્ય સંઘ લિમિટેડ
- વર્ષ : 1951