રેખ્તા
હિન્દવી
સૂફીનામા
રાજસ્થાની
ન્હાનાલાલ દલપતરામ કવિ
૧
જગ! ગજવજે ઘોર ગીતડાં;
ઘડી નચવજે કાન્ત ચિતડાં:
નમેરી છાયાનો વિકટ તુજ ઘેરો ઘટ થશે,
તથાપિ જ્યોત્સ્નાના મણિમય પ્રીતિપન્થ દીપશે.
ર
ભલે પ્રિયે! તો અનિલે ઘૂમે, અને
ઘેરી સખી! વાદળિયા વીંટે ત્હને;
કઠોરના માનવ દૃષ્ટિ નાંખશે,
સૌન્દર્યરેખા પ્રણયાર્દ્ર ઝાંખશે.
૩
ચુમ્બે પેલા શ્યામ સિન્ધુતરંગો
આછા જેવા પાતળા મેઘરંગો;
બ્રહ્માંડો એ સન્ધિકામાં રમે છે;
વ્હાલી! એવી તુજ રસવ્રુતિ પ્રેમમાં આથમે છે.
૪
ભલે પ્રિય! તે। ઘડી સૌમ્ય ઝાંખશુ,
રસેન્દુનું અન્તર સ્થાન રાખશું;
બતાવજે ઉજ્વળ પાટ પાથરી
પ્રાણેશ્વરી! સેંથી તું દિવ્યતાભરી.
પ
આછા પેલા શ્યામ અબ્ધિતરંગો
વ્હાલી! ત્હારી મૂર્તિ જો! મેઘ રંગે;
વિશ્વાન્તર્માં ગીત શાં ઘોર ગાજે!
વ્હાલી! ત્ય્હાં કે પ્રણયરસીલી આત્મજ્યોતિ વિરાજે.
૬
જગત! ગીત ત્હારાં ગજવજે:
કદિ વિમલ આત્મા લજવજેઃ
ઊંડાં અન્ધારાંનો વિકટ ઘટ ઘેરોય મટશે,
ચળાતી જ્યોત્સ્નાનો મણિમય પ્રીતિપન્થ દીપશે.
સ્રોત
- પુસ્તક : કાવ્યસંચય - 2 (પૃષ્ઠ ક્રમાંક 197)
- સંપાદક : ધીરુભાઈ ઠાકર, વ્રજલાલ દવે
- પ્રકાશક : ગુજરાતી સાહિત્ય પરિષદ
- વર્ષ : 1980