રેખ્તા
હિન્દવી
સૂફીનામા
રાજસ્થાની
જુઆરાં વહેંચીએ રે લોલ.
juaran wahenchiye re lol
રસિયા! વાડાની વરખડિયે,
મધડાં બેસિયાં રે લોલ.
રસિયા! નિસરણી મંગાવો
મધડાં લેઈયે રે લોલ.
રસિયા! ચાંદીને વાટકડે
મધડાં ઝીલીએ રે લાલ.
રસિયા! નિસરણી ખસી ને,
મધડાં ઢળી ગયાં રે લોલ.
રસિયા! સસરાને બોલાવો,
જુઆરાં વહેંચીએ રે લોલ.
રસિયા! સાસુને તેડાવો,
જુઆરાં વહેંચીએ રે લોલ.
રસિયા! પરસાળે ઓરડા,
તે આપણ શોભતા રે લોલ.
રસિયા! ઝાંપાની ઝૂંપડી,
તે વેરવણ શૉક્યને રે લોલ.
રસિયા! જેઠને તેડાવો,
જુઆરાં વહેંચીએ રે લોલ.
રસિયા! જેઠાણીને તેડાવો,
જુઆરાં વહેંચીએ રે લોલ.
રસિયા ! હીંદોળા ખાટો,
તે આપણ શોભતી રે લોલ
રસિયા ! તૂટેલી ખાટલી
તે વેરવણ શૉક્યને રે લોલ.
રસિયા ! દિયેરને તેડાવો
જુઆરાં વહેંચીએ રે લોલ.
રસિયા ! દેરાણીને તેડાવો
જુઆરાં વહેંચીએ રે લોલ.
રસિયા ભૂરણી ને ભેશો
તે આપણ શોભતી રે લોલ.
રસિયા ! કાળી ને ડોબડી,
તે વેરવણ શૉક્યને રે લોલ.
રસિયા ! ધોળી તે ગાયો
તે આપણ શોભતી રે લોલ.
રસિયા ! કાળી ને બકરી
તે વેરવણ શૉક્યને રે લોલ.
રસિયા ! તાંબાનાં બેઢાં
તે આપણ શોભતાં રે લોલ.
રસિયા ! કચરાનું બેઢું
તે વેરવણ શૉક્યનું રે લોલ.
રસિયા ! નણંદને તેડાવો
જુઆરાં વહેંચીએ રે લોલ.
રસિયા ! નણદોઈને તેડાવો,
જુઆરાં વહેંચીએ રે લોલ.
રસિયા ! બબલો ને છોકરો
તે આપણ શોભતો રે લોલ.
રસિયા ! કાણો ને કૂબડો
તે વેરવણ શૉક્યનો રે લોલ.
સ્રોત
- પુસ્તક : ગુજરાતી લોકસાહિત્યમાળા – મણકો–1 (પૃષ્ઠ ક્રમાંક 221)
- સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1957