શોક્ય

હરિ! સમણામાં મેં પારસપીપળો દીઠો જો :

તુળસીના ક્યારા રે મારા સમણામાં—

હરિ! સમણામાં મેં ડોલતા ડુંગર દીઠા જો :

વહેતી તે નદીઓ રે મારા સમણામાં—

હરિ! સમણામાં મેં ગામે વલોણાં દીઠા જો :

ઘીઈની વાઢીઓ રે મારા સમણામાં—

હરિ! સમણામાં મારા હસતા હીરા દીઠા જો :

મોતીની સેરો તે મારા સમણામાં—

હરિ! સમણામાં મેં તો ઘૂમતું છાણું દીઠું જો :

ખડખડતી ખરસાણી રે મારા સમણામાં—

પારસપીપળો એ તો મારો ગોર જો :

તુલસીના કયારા તે મારી ગોરણી—

ડોલતા ડુંગર એ તો મારો સસરો જો :

વહેતી તે નદીઓ તે મારાં સાસુજી—

ગામે વલોણાં એ તો મારા જેઠ જો :

ઘીઈની વાઢીઓ તે મારી જેઠાણી—

હસતા હીરા એ તો મારા વીર જો :

મોતીની સેરો તે મારાં ભાભીજી—

ઘૂમતું છાણું એ તો મારી શૉક્ય જો :

ખડખડતી ખરસાણી એ મારી પાડોશણ—

પુસ્તક : ગુજરાતી લોકસાહિત્યમાળા – મણકો–1 (પૃષ્ઠ ક્રમાંક 227)
સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1957

shokya