રેખ્તા
હિન્દવી
સૂફીનામા
રાજસ્થાની
સખી પડવે તે પંથથી ચાલ્યા રે
sakhi paDwe te panththi chalya re
સખી પડવે તે પંથથી ચાલ્યા રે, મહાવનના તે મારગ ઝાલ્યા રે!
સાથે સીતાને લક્ષ્મણ બાળા : રઘુપતિ રામ રૂદેમાં રે’જો રે!
સખી બીજે મઢીમાં બીરાજે રે, તેવા નદીઓ તણા નીર ગાજે રે!
રામ મૂકી ગયા રૂડું રાજે : રઘુપતિરામ રૂદેમાં રે’જો રે!
સખી ત્રીજે તે વનની ઝાડી રે, દશફળ મંગાવે દાડી દાડી રે!
સારી શોભે સીતાજીની વાડી; રઘુપતિરામ રૂદેમાં રે’જો રે!
સખી ચોથે કેવડિયો બેંકે રે, ફાલ્યો ફૂલ્યો તે મોગરો મે’કે રે!
લીલી લીલી લતાઓ લહેંકે : રઘુપતિ રામ રૂદેમાં રે’જો રે!
સખી પાંચમે પોપટું પાળો રે, પાંખલીલી ને કાંઠલો કાળો રે!
રામ નામ ભણંતા મેં ભાળો : રઘુપતિરામ રૂદેમાં રે’જો રે!
રાખી છઠ્ઠે છેતરવાને આવ્યો રે, કુડો કપટી રાવણ સાથે લાવ્યો રે!
બે મુખનો મરગ બનાવ્યો : રઘુપતિ રામ રૂદેમાં રે’જો રે!
સખી સાતમે શ્રીહરિ સમર્યા રે, ફળ સાંઈ ઉપાડ્યા રે ડમરા રે!
વાડી ભેળા ઉડાડ્યા ભમરા : રઘુપતિરામ રૂદેમાં રે’જો રે!
સખી આઠમે એને નિહાળી રે, ધનુષ્યધારીને મૃગલો માર્યો રે!
મરગ મરતી વખતે પોકાર્યો, રઘુપતિરામ રૂદેમાં રે’જો રે!
સખી નોમે તે નાંખ્યો તીર રે, જઈ વાગ્યા છે મરગ શરીરે રે!
વારે ધાજો લક્ષ્મણ વીર, રઘુપતિરામ રૂદેમાં રે’જો રે!
સખી દશમે કહે લક્ષ્મણને રે, બોલી વીર બોલાવે છે તમને રે!
આડી આણું દીધી છે અમને : રઘુપતિ રામ રૂદેમાં રે’જો રે!
સખી બારશે હનુમાન બળિયા રે, ઠેકી સમુદ્ર પાર ઉતરિયા રે!
જઈ જોગમાયાને મળિયા, રઘુપતિરામ રૂદેમાં રે’જો રે!
સખી તેરશે તંબાળુ ગાજે રે, હાક હનુમન્ત કેરી વાગે રે!
લાહ્ય લંકા તે ગઢમાં લાગે, રધુપતિરામ રૂદેમાં રે’જો રે!
સખી ચૌદશે ચિત્તવિચારી રે, ફોજ વાંદરની રચી સારી રે!
રામે રાવણ નાંખ્યો મારી, રઘુપતિરામ રૂદેમાં રે’જો રે!
સખી પૂનમે પરભૂ ઘેર આવ્યા રે, થાળભરી મોતીડે વધાવ્યાં રે!
માતા કૌશલ્યાને મનભાવ્યાં, રઘુપતિરામ રૂદેમાં રે’જો રે!
સખી પંદરતિથિ થઈ પૂરી રે, એમાં એકે નથી અધુરી રે!
આત્મારામની વાણી મધુરી, રઘુપતિરામ રૂદેમાં રે’જો રે!
સ્રોત
- પુસ્તક : ગુજરાતી લોકસાહિત્યમાળા – મણકો– ૩ (પૃષ્ઠ ક્રમાંક 103)
- સંપાદક : ગુજરાત લોકસાહિત્ય સમિતિ (ધૂમકેતુ, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા, કનૈયાલાલ જોશી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1963