રેખ્તા
હિન્દવી
સૂફીનામા
રાજસ્થાની
કાઠિયાણી
kathiyani
કાઠિયાણી કેડ પાતળી રે લોલ,
ચાલે ચટકતી ચાલ, અલબેલડી;
અહુરી વેળાનાં પાણી સાંચર્યાં રે લોલ.
પાંચ પટાનો ઘાઘરો રે લોલ,
ઓઢણી દખણી ચીર અલબેડી;
અહુરી વેળાનાં પાણી સાંચર્યાં રે લોલ.
લીલી અટલસનું કાપડું રે લોલ,
હૈડે હંસલા ને મોર, અલબેલડી;
અહુરી વેળાનાં પાણી સાંચર્યાં રે લોલ.
ઠાંસીને માથાં ગુંથિયાં રે લોલ,
સેંથલે શેર સીંદુર, અલબેલડી;
અહુરી વેળાનાં પાણી સાંચર્યાં રે લોલ.
આછી તે પિયળ ધમધમે રે લોલ,
મોતીડાં તપે રે લેલાડ, અલબેલડી;
અહુરી વેળાનાં પાણી સાંચર્યાં રે લોલ.
સોના ઈંઢોણી રૂપાં બેડલું રે લોલ,
પાણીડાં ગ્યાં’તાં તળાવ, અલબેડી;
અહુરી વેળાનાં પાણી સાંચર્યાં રે લોલ.
રાયે તે ઘોડો ખેલવ્યો રે લોલ,
પરધાનને પૂછી વાત, અલબેલડી;
અહુરી વેળાનાં પાણી સાંચર્યાં રે લોલ.
કેરસ કેરી બેટડી રે લોલ,
કેરસ કુળ વહુવારુ? અલબેલડી;
અહુરી વેળાનાં પાણી સાંચર્યાં રે લોલ.
કેરસ કેરી બેનડી રે લોલ,
કેરસ ઘરડાની નાર, અલબેલડી;
અહુરી વેળાનાં પાણી સાંચર્યાં રે લોલ.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 67)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ, વસંત જોધાણી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968