રેખ્તા
હિન્દવી
સૂફીનામા
રાજસ્થાની
પડવે પ્રીત કરું છું પહેલી
paDwe preet karun chhun paheli
પડવે પ્રીત કરું છું પહેલી,
વાલે મારે અઘોર વનમાં મેલી;
દિવસ બહુ થયાં રે લોલ!
બીજે કાંઈ ન જાણું બીજુ,
જોબન ભમરો થઈને ઊડે;
દિવસ બહુ થયાં રે લોલ!
ત્રીજી તન તપે તમારા,
જોબન વયા જશે અમારા;
દિવસ બહુ થયાં રે લોલ!
ચોથે ચતુરા સરખી નારી,
મનડા રાખ્યા એને વારી;
દિવસ બહુ થયાં રે લોલ!
પાંચમે પરદેશ કીધી પ્રીતું,
વાલે મારે એ રાખી છે રીતું;
દિવસ બહુ થયાં રે લોલ!
છઠ્ઠે છઠ્ઠીના લખ્યા લેખ,
વિધાત્રીએ અવળા લખ્યા લેખ;
દિવસ બહુ થયાં રે લોલ!
સાતમે આવોને અલબેલા,
મારા રંગીલાના રેલી;
દિવસ બહુ થયાં રે લોલ!
આઠમે આનંદ ઔછવ થાય,
ગોપીયું ગરબે રમવા જાય;
દિવસ બહુ થયાં રે લોલ!
નવમે નમીએ મારા નાથ,
હરિએ ઝાલ્યા તેમના હાથ;
દિવસ બહુ થયાં રે લોલ!
દશમે દયા કરી દીનબેલી,
વાલે મારે કૂવામાં મેલ્યા ઠેલી;
દિવસ બહુ થયાં રે લોલ!
અગીયારશે એકાદશીના વ્રત,
વાલે મારે બહુ કર્યા છે તપ;
દિવસ બહુ થયાં રે લોલ!
બારશે બત્રીશ વાડીની રસોયું,
તેરશે તેત્રીશ વાડીના શાક;
દિવસ બહુ થયાં રે લોલ!
ચૌદશે ચિંતા મેલી નાથ,
હરિએ ઝાલ્યો મારો હાથ;
દિવસ બહુ થયાં રે લોલ!
પુનમે પંદર તિથિ થઈ પૂરી,
તેમાં એક નથી અધુરી;
દિવસ બહુ થયાં રે લોલ!
સ્રોત
- પુસ્તક : ગુજરાતી લોકસાહિત્યમાળા – મણકો– ૪ (પૃષ્ઠ ક્રમાંક 55)
- સંપાદક : ગુજરાત લોકસાહિત્ય સમિતિ (ધૂમકેતુ, મંજુલાલ ર. મજમૂદાર, પુષ્કર ચંદરવાકર, સુધા રમણલાલ દેસાઇ, મધુભાઈ પટેલ, કનૈયાલાલ જોશી, પદ્મજા ચંદરવાકર.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1964