wasantwarnan - kavitaayen | RekhtaGujarati

રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો
search search
લૉગ-ઇન

વસંતવર્ણન

wasantwarnan

નવલરામ લક્ષ્મીરામ પંડ્યા નવલરામ લક્ષ્મીરામ પંડ્યા
વસંતવર્ણન
નવલરામ લક્ષ્મીરામ પંડ્યા

હોરી

પચરંગી પટકુલ ધારી,

દીપે કુદરત આ રતે ન્યારી.

કુમળાં ચળકતાં વૃક્ષે સજ્યાં નવ પલ્લવ જૂનાં ઉતારી,

આંબે મોર અથાગ જ ઝૂકે, જાણે કલગીઓ સારી;

વસંતની આવી સવારી! દીપેo ૧

વીંટી વળી વેલી સૌ સૌને, વૃક્ષે હસ્ત પ્રસારી,

ફૂલનાં ઝૂમખે ઝૂમખાં જે પર, રંગબેરંગી અપારી!

ઝૂલે ઝાડી ફૂલ ભરી ભારી. દીપેo ર

ફૂલભરી ડાળો ડોલે, ખરે ફૂલ, પથરાઈ ફૂલની પથારી,

ભ્રમર હજારો ગુંજાર કરતાં, સુગંધી લેતાં ગયાં હારી!

બધું રહ્યું બહેક જ્યાં મારી! દીપેo ૩

ફૂલભરી ડાળો ડોલે હીંચોળે, બેઠાં પોપટ મેના પ્યારી,

ને નવરંગી અવર બહુ પંખી, મધુર કરે રવ તારી;

કોયલની છે બલિહારી!દીપેo ૪

કોયલો કૂકૂ કૂકૂ કરી રહે, પંચમ સૂર અનુરાગી,

ઘટ્ટ ઘટામાં પડઘા પડે ને કુંજ દીપી રહી સારી; પ

મનોહર કામણગારી! દીપેo

દ્રાક્ષને માંડવે લાખો દરાખો, લીલી લોચનઠારી;

કુમળા બપોરના તાપે તરસ્યાના હાથ લોભાવનારી;

કંઠે ઠંડક કરનારી! દીપેo ૬

ઊગ્યા ગુલાબ, ને આવી ગુલાબી ટાઢની તો હવે વારી!

વારે સવારમાં મંદ સુગંધિત, શીતળ સમીર સુખકારી;

અંગે ઉમંગ વધારી! દીપેo ૭

રંગ્યાં ઉમંગ્યાં પશુ, પંખી, નર, નાર, કુમાર, કુમારી,

સર્વે સજોડે રમે, જમે કોડે, સર્વ કરે મઝાદારી;

મુખે મીઠી હોરી ઉચારી! દીપેo ૮

હોરીના સુર ઘૂમી રહ્યા ચોગમ, ચોગમ લગન છે જારી,

લગનસર! તો વસંતે જ સોહે, વસંત છે લગન આચારી!

જેણે રચી અજબ તૈયારી! દીપેo ૯

એ રીતે આ રતે પાંચે ઇક્રિયો, ને હૃદય રીઝ્યાં સંસારી,

હોળીરમણ, આ હરખમરણની, રીત સ્વાભાવિક ધારી;

ગણો ચાલ ગંદી નઠારી! દીપેo ૧૦

સંત સ્તવે ભગવંત વસંતે, ઉચ્ચ સ્વરે લલકારી,

જેણે જગતમાં ચોગમ ફરતી, આવી અનુપ ઉપકારી;

લલિત લીલા વિસ્તારી!દીપેo ૧૧

જય! જય! જય! સચરાચર સુંદર, જય ચિદ્રૂપ ભયહારી,

જય! જય! એક અકળ, બ્રહ્માંડ, અખંડ અખિલ વિહારી;

નવલ તનમનના ધારી.દીપેo ૧ર

સ્રોત

  • પુસ્તક : બાળ ગરબાવલી (પૃષ્ઠ ક્રમાંક 37)
  • સર્જક : નવલરામ લક્ષ્મીરામ પંડ્યા
  • પ્રકાશક : વસુમતિ ધીમતરામ નવલરામ
  • વર્ષ : 1941
  • આવૃત્તિ : 39