wembliman laDakhDe chhe gurjari - Ghazals | RekhtaGujarati
search search
લૉગ-ઇન

વૅમ્બલીમાં લડખડે છે ગુર્જરી

wembliman laDakhDe chhe gurjari

અદમ ટંકારવી અદમ ટંકારવી
વૅમ્બલીમાં લડખડે છે ગુર્જરી
અદમ ટંકારવી

વૅમ્બલીમાં લડખડે છે ગુર્જરી

જિન્સ પહેરીને ફરે છે ગુર્જરી

લૅસ્ટરમાં સહેજ ઊંચા સાદથી

શૉપમાં રકઝક કરે છે ગુર્જરી

બ્લેકબર્નમાં ખૂબ હાંફી જાય છે

બર્ફ પર લપસી પડે છે ગુર્જરી

બોલ્ટનમાં જાણે બોમ્બેમિક્ષ છે

ત્યાં પડીકાંમાં મળે છે ગુર્જરી

હાળું અંઈ હુરતના જેવું ની મલે

બૅટલીમાં ગાળ દે છે ગુર્જરી

પાંચ વાગે હું તને પિક્અપ કરીશ

એમ દીકરીને કહે છે ગુર્જરી

એક મૅડમ ક્યારની કહે છે શટ્અપ

તે છતાં બોલ્યા કરે છે ગુર્જરી

સીલી બુલશીટ ડમ્બ સ્ટુપીડ રબીશ

સાંભળી લાજી મરે છે ગુર્જરી

લોક બર્ગર ખાય છે ગુજરાતમાં

ને અહીં ભજિયાં તળે છે ગુર્જરી

વાસીકુસી થઈ ગઈ બારાખડી

ફ્રિજમાં એ સાચવે છે ગુર્જરી

આંખ મીંચી નર્મદાનું નામ લઈ

થેમ્સમાં ડૂબી મરે છે ગુર્જરી

આંગ્લભાષા આ સતત બુલિંગ કરે

તે છતાં હસતી રહે છે ગુર્જરી

એ બ્રિટનમાં આવી બ્રિજરાતી થઈ

અવનવા રંગો ધરે છે ગુર્જરી

હાશ કહીને બૅન્ચ પર બેસી પડે

એકલી બબડ્યા કરે છે ગુર્જરી

ક્યાંક વિન્ટર થઈને થીજી જાય છે

ક્યાંક ઑટમ થઈ ખરે છે ગુર્જરી

કોક એને પણ વટાવી ખાય છે

પાંચ પૅનીમાં મળે છે ગુર્જરી

સાંધાવાળો સાડલો પહેરી ફરે

ક્યાં હવે દીઠી ગમે છે ગુર્જરી

આર્થરાઈટીસથી હવે પીડાય છે

લાકડી લઈને ફરે છે ગુર્જરી

સાંજ પડતાં એને પિયર સાંભરે

ખૂણે બેસીને રડે છે ગુર્જરી

જીવ પેઠે સાચવે એને અદમ

ને અદમને સાચવે છે ગુર્જરી

રસપ્રદ તથ્યો

વૅમ્બલી : લંડનનો ગુજરાતી વિસ્તાર; લૅસ્ટર, બ્લેકબર્ન, બોલ્ટન, બૅટલી : બ્રિટનના શહેર; બોમ્બેમિક્ષ : ચેવડો; થેમ્સ : લંડનની નદી.

સ્રોત

  • પુસ્તક : ગુજલિશ ગઝલો (પૃષ્ઠ ક્રમાંક 6)
  • સર્જક : અદમ ટંકારવી
  • પ્રકાશક : આર. આર. શેઠની કંપની
  • વર્ષ : 2001