સખાવત પ્રસિદ્ધિના ચરણે પડી છે

સખાવત પ્રસિદ્ધિના ચરણે પડી છે

ગરીબોની લાચારી છાપે ચડી છે!

નડે ફૂલને જે રીતે એની ખુશ્બુ

મને એમ મારી ભલાઈ નડી છે.

તમે મૌનનો મહિમા ઝાઝો ગણો, પણ

આ સંવાદ સગપણની પોષણકડી છે.

ઘડી બે ઘડીમાં ફરી જાશે પાનું,

હો સુખ કે હો દુઃખ બસ ઘડી બે ઘડી છે.

આ સૂમસામ રસ્તા ને ભેંકાર ગલીઓ

નગરને શું મારી ઉદાસી અડી છે?

તને પણ હું જીવું છું મારી કથામાં

કથા બેવડી તો વ્યથા બેવડી છે!

sakhaavat prasiddhinaa charne padii chhe