રેખ્તા
હિન્દવી
સૂફીનામા
રાજસ્થાની
ખાંસે છે વૃદ્ધ ફાધર એ ઓરડો જુદો છે
khanse chhe wriddh phadhar e orDo judo chhe
રાજેશ વ્યાસ 'મિસ્કીન'
ખાંસે છે વૃદ્ધ ફાધર એ ઓરડો જુદો છે
khanse chhe wriddh phadhar e orDo judo chhe
રાજેશ વ્યાસ 'મિસ્કીન'
રાજેશ વ્યાસ 'મિસ્કીન'
ખાંસે છે વૃદ્ધ ફાધર એ ઓરડો જુદો છે,
બેસે છે ઘરના મેમ્બર એ ઓરડો જુદો છે.
એકેક શ્વાસ જાણે ચાલી રહ્યા પરાણે
ઘરમાં છતાં ય બેઘર એ ઓરડો જુદો છે.
મહેમાન કોઈ આવે વાતો જૂની સુણાવે
લાગે કદીક પળભર એ ઓરડો જુદો છે.
ઘરમાં જૂનું જે થાતું, બદલાઈ તરત જાતું
બદલાય ના તસુભર એ ઓરડો જુદો છે.
મૃત્યુ પછી પિતાના ખર્ચે કરી સજાવ્યો,
લાવ્યા ખરીદી ઈશ્વર એ ઓરડો જુદો છે.
સ્રોત
- પુસ્તક : બેસ્ટ ઑફ મિસ્કીન (પૃષ્ઠ ક્રમાંક 112)
- સંપાદક : હર્ષ બ્રહ્મભટ્ટ
- પ્રકાશક : નવભારત સાહિત્ય મંદિર
- વર્ષ : 2013