લખ્યું છે બ્રેઈલમાં મારું મરણ, એની ઉદાસી છે

લખ્યું છે બ્રેઈલમાં મારું મરણ, એની ઉદાસી છે,

ઉપરથી હાથ આપ્યા છે અભણ, એની ઉદાસી છે.

સરી ગઈ રાત સાથે ચાંદની પણ આંગળીમાંથી,

ન સચવાયાં હથેળીમાં કિરણ, એની ઉદાસી છે.

લીલાંછમ ઘાસમાં વરસાદ વેરાયાની ક્ષણ વચ્ચે,

પગરખાં શોધવા નીકળ્યા ચરણ, એની ઉદાસી છે.

સ્મરણની શ્વેત કાગળ-નાવ જ્યાં તરવા મૂકી જળમાં,

ચીરાયું વસ્ત્રની માફક ઝરણ, એની ઉદાસી છે.

હું જાણું છું કથા પણ તો ય પાછળ દોડવું પડશે,

ફરે છે એક માયાવી હરણ, એની ઉદાસી છે.

lakhyun chhe breilman marun maran, eni udasi chhe