વખત વીત્યાની આખી વિગત રંગારા

વખત વીત્યાની આખી વિગત રંગારા;

લખી જણાવી, જાણે તું જત રંગારા.

ભીંતો રંગી ને, રંગી છત રંગારા;

છતાંય પામ્યાં નહિ, ઘરની ગત રંગારા!

જેની સાથે તારી સોબત રંગારા;

એની શાથી કોરી છે પ્રત રંગારા?

તારા રંગો તો અજવાળે પળ બે પળ;

પણ મારું, અંધારું શાશ્વત રંગારા!

રંગો ઘોળી જ્યાં જુઓ ત્યાં રંગે છે;

પોતે હો જાણે, પારંગત રંગારા!

આ કાંઠે હું પીંછી લઈને બેસું તો-

સામે કાંઠે બાજે છે તત રંગારા!

કૅનવાસ પર જીવતર ઊપસી આવ્યું છે!

આંખો વેઠી રહી છે આરત રંગારા!

એના કાગળ એની માફક તરસ્યા છે;

જેની, પીંછીએ રાખ્યાં, વ્રત રંગારા!

બધાંય દૃશ્યોને નીરખીને જોયા તો;

દેખાણા તારા જ દસ્તખત, રંગારા!

vakhat viityaanii aakhii vigat rangaaraa