રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ઉમ્રભર શ્વાસેશ્વાસ રહેવાની

આદિલ મન્સૂરી

ઉમ્રભર શ્વાસેશ્વાસ રહેવાની

આદિલ મન્સૂરી

Roman

ઉમ્રભર શ્વાસેશ્વાસ રહેવાની

ગુલબદનની સુવાસ રહેવાની

આપ ચ્હેરો ભલે છુપાવો પણ

ચાંદની આસપાસ રહેવાની

દિલમાં દરિયો ભલે ઊછળતો રહે

હોઠ ઉપર તો પ્યાસ રહેવાની

તારી આંખોનો દોષ હો કે ન હો

ટેવ દિલને ઉદાસ રહેવાની

તારા હોઠોની મારા હોઠો પર

જિંદગીભર મીઠાશ રહેવાની

કોને કોને તમે મળી આવ્યા

પગલે પગલે તપાસ રહેવાની

ચાંદની તો કોઈ લઈ ચાલ્યું

મારી સાથે અમાસ રહેવાની

ફૂલ મૂકી ગયા કબર પર એ

ઊંડે ઊંડે સુવાસ રહેવાની

અન્ય બાબત કશું નથી કહેવું

પણ ગઝલમાં તો ઠાંસ રહેવાની

ફૂલ આદિલ ખરી પડ્યું તોપણ

ડાળ ઉપર સુવાસ રહેવાની

સ્રોત

પુસ્તક : મળે ન મળે (પૃષ્ઠ ક્રમાંક 137)
સર્જક : આદિલ મન્સૂરી
પ્રકાશક : વોરા ઍન્ડ કંપની
વર્ષ : 1996