ઉમ્રભર શ્વાસેશ્વાસ રહેવાની

ઉમ્રભર શ્વાસેશ્વાસ રહેવાની

ગુલબદનની સુવાસ રહેવાની

આપ ચ્હેરો ભલે છુપાવો પણ

ચાંદની આસપાસ રહેવાની

દિલમાં દરિયો ભલે ઊછળતો રહે

હોઠ ઉપર તો પ્યાસ રહેવાની

તારી આંખોનો દોષ હો કે ન હો

ટેવ દિલને ઉદાસ રહેવાની

તારા હોઠોની મારા હોઠો પર

જિંદગીભર મીઠાશ રહેવાની

કોને કોને તમે મળી આવ્યા

પગલે પગલે તપાસ રહેવાની

ચાંદની તો કોઈ લઈ ચાલ્યું

મારી સાથે અમાસ રહેવાની

ફૂલ મૂકી ગયા કબર પર એ

ઊંડે ઊંડે સુવાસ રહેવાની

અન્ય બાબત કશું નથી કહેવું

પણ ગઝલમાં તો ઠાંસ રહેવાની

ફૂલ આદિલ ખરી પડ્યું તોપણ

ડાળ ઉપર સુવાસ રહેવાની

umrbhar shwaseshwas rahewani