તેં વિચાર્યું કાંકરી રાખી હતી

તેં વિચાર્યું કાંકરી રાખી હતી,

મુઠ્ઠીમાં મેં પાંદડી રાખી હતી.

ઓરડા આખાને મહેકાવી ગઈ,

મેં તો ખાલી છાબડી રાખી હતી!

એક ચકલી સાનમાં સમજી ગઈ!

હોઠ પર મેં આંગળી રાખી હતી.

એક હાથે તે દીધો ફુગ્ગો મને,

બીજા હાથે ટાંકણી રાખી હતી.

લાકડી સમજી સદા તે અવગણી,

મેં તો પાસે વાંસળી રાખી હતી.

થઈ ગયો પર્યાય એ ગુજરાનનો,

દૂધ પીવા ગાવડી રાખી હતી.

તારલા મળવા તને આવ્યા હતા,

ક્યાં તે ખુલ્લી ઝાંપલી રાખી હતી?

ten vichaaryun kaankari raakhii hatii