તસવીરમાં…

તસવીરમાં…

ધ્યાનથી જો કોઈ દેખાતું નથી તસવીરમાં,

અર્થ એનો, કૈંક તો બાકી હજી તસવીરમાં.

માણસોને બાંધી રાખે જિંદગી આ ક્રમ મુજબ,

ગર્ભથી સીધા જ દુનિયામાં પછી તસવીરમાં.

મેં ઉપરનો કાચ એવું માનીને ફોડી દીધો,

ગૂંગળામણ કોઈને થાતી હતી તસવીરમાં.

ઓ... સમય અસ્તિત્વને તારા ટકાવી રાખવા,

એક ક્ષણ મારેય જો પૂરવી પડી તસવીરમાં

ભીંત પર લીલોતરી ઊગશે એ નક્કી છે 'મધુર'

ઘેર લાવ્યો છું હું એક વહેતી નદી તસવીરમાં.

tasviirmaan...