તારું તો ફકત થોડુંઘણું પીઠબળ હતું

તારું તો ફકત થોડુંઘણું પીઠબળ હતું,

મારી તમામ છાતી ઉપર પાયદળ હતું.

હત્યા કે આત્મહત્યા, અકસ્માત, માંદગી,

મૃત્યુને હાથવેંતમાં કારણ સબળ હતું.

જીવનમાં તારો સાથ મળ્યો જ્યાં સુઘી મને,

આ આયખામાં એટલું જીવન સફળ હતું.

કાલે બપોરે છાંયડા હાંફી ગયા હતા,

તડકે મૂકેલ આખું નગર કળ-વિકળ હતું.

એની ખલીલ! આંખ તો પરખાઈ ગઈ હતી,

ભીતર હજી અજાણ્યું હતું, મન અકળ હતું.

Taru to fakt thodughanu pithbal hatu