રેખ્તા
હિન્દવી
સૂફીનામા
રાજસ્થાની
ટપકે છે લોહી આંખથી પાણીના સ્વાંગમાં!
કાવ્યો મળી રહ્યાં છે કહાણીના સ્વાંગમાં!
આપણને આદિકાળથી અકળાવતું હતું,
લાવ્યો છું એ જ મૌન હું વાણીના સ્વાંગમાં!
બસ આમ સ્થિર દૃષ્ટિ વડે સ્પર્શતાં રહો,
લાગે છે બહુ સુંવાળી એ શાણીના સ્વાંગમાં!
સળગી રહ્યું છે સ્વપ્નગગન, સાંજ તો જુઓ!
જાણે ખડી છે લ્હાય લહાણીના સ્વાંગમાં!
પૂનમ ગણી હું જેમની પાસે ગયો હતો,
એ તો હતી ઉદાસી ઉજાણીના સ્વાંગમાં!
પોથી બગલમાં જોઈને ભરમાઈ ના જતાં,
પાખંડીઓ ફરે છે પુરાણીના સ્વાંગમાં.
‘ઘાયલ’, અમારે શુદ્ધ કવિતાઓ જોઈએ,
દાસીના સ્વાંગમાં હો કે રાણીના સ્વાંગમાં.
સ્રોત
- પુસ્તક : ચૂંટેલી ગઝલો – અમૃત ઘાયલ (પૃષ્ઠ ક્રમાંક 51)
- સંપાદક : નીતિન વડગામા
- પ્રકાશક : ગુજરાત સાહિત્ય અકાદમી
- વર્ષ : 2022