રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

તડકો સીધો ઘરમાં આવે

સ્નેહી પરમાર

તડકો સીધો ઘરમાં આવે

સ્નેહી પરમાર

વાત અસલ કાગળમાં આવે

શબ્દો ત્યાં તો વચમાં આવે

એનાથી મોટો શો વૈભવ!

તડકો સીધો ઘરમાં આવે

ભીતર ભીનું સંકેલો, ત્યાં

આંખોમાંથી પડમાં આવે

સાર બધા ગ્રંથોનો એક જ

પાથરીએ તે પગમાં આવે

તો માથે મૂકીને નાચું

ઘટઘટમાં, તે ઘટમાં આવે

પકડ્યો છે પડછાયો, સાધો!

અજવાળું શું બથમાં આવે!

સ્રોત

પુસ્તક : યદા તદા ગઝલ (પૃષ્ઠ ક્રમાંક 41)
સર્જક : સ્નેહી પરમાર
પ્રકાશક : રંગદ્વાર પ્રકાશન
વર્ષ : 2015