તબીબો પાસેથી હું નીકળ્યો દિલની દવા લઈને

આ વિડિયો યુટ્યુબ પરથી ચાલી રહ્યો છે

તબીબો પાસેથી હું નીકળ્યો દિલની દવા લઈને.

જગત સામે જ ઊભેલું હતું દર્દો નવાં લઈને.

ગમી પણ જાય છે ચહેરા કોઈ, તો એમ લાગે છે-

પધાર્યાં છો તમે ખુદ રૂપ જાણે જૂજવાં લઈને.

તરસને કારણે નહોતી રહી તાકાત ચરણોમાં,

નહીં તો હું ય નીકળી જાત રણથી ઝાંઝવાં લઈને.

સફરના તાપમાં માથા ઉપર એનો જ છાંયો છે,

હું નીકળ્યો છું નજરમાં મારાં ઘરનાં નેજવાં લઈને.

બધાનાં બંધ ઘરનાં દ્વાર ખખડાવી ફર્યો પાછો,

અને એ પણ ટકોરાથી તૂટેલાં ટેરવાં લઈને.

કરું છું વ્યક્ત એ માટે જ એને ગાઈ ગાઈને,

ગળે આવી ગયો છું હું અનુભવ અવનવા લઈને.

હું રજકણથી ય હલકો છું તો પર્વતથીય ભારે છું,

મને ના તોળશો લોકો, તમારાં ત્રાજવાં લઈને.

સુખી જનની પડે દૃષ્ટિ તો એ ઈર્ષા કરે મારી,

હું આવ્યો છું ઘણાં એવાં દુઃખો પણ આગવાં લઈને.

ફક્ત એથી મેં મારા શ્વાસ અટકાવી દીધા બેફામ,

નથી જન્નતમાં જાવું મારે દુનિયાની હવા લઈને.

tabibo pasethi hun nikalyo dilni dawa laine