રેખ્તા
હિન્દવી
સૂફીનામા
રાજસ્થાની
સૂરજનું ઊગવું
surajanun ugawun
કાયમ હઝારી
કાયમ હઝારી
તારા જ નામના આ સૂરજનું ઊગવું,
શું કામનું નકામા સૂરજનું ઊગવું?
બળતાં ઘરોથી ઝળહળે જ્યાં રાતનું તમસ-
છે વ્યર્થ એ જગામાં સૂરજનું ઊગવું!
કેવું હશે બતાવો? કેવું હશે કહો??
સપનામાં આંધળાના સૂરજનું ઊગવું.
રાતોનું એક ટોળું નીકળ્યું છે શોધવા –
ધુવડના પોપચામાં સૂરજનું ઊગવું!
દિલ્હીની રોશનીમાં ભૂલું પડી ગયું –
આ દેશની પ્રજાના સૂરજનું ઊગવું.
પૂરી દીધું છે ‘કાયમ’ એના ગયા પછી –
યાદોના ઓરડામાં સૂરજનું ઊગવું.
સ્રોત
- પુસ્તક : આદમ ઈવનું પહેલું ચુંબન (પૃષ્ઠ ક્રમાંક 32)
- સર્જક : ‘કાયમ’ હઝારી
- પ્રકાશક : નવભારત સાહિત્ય મંદિર
- વર્ષ : 1994